us ne ma.il-ba-karam ho ke bulaya hai mujhe
aaj phir dil ne ye afsana sunaya hai mujhe
sard-mehri pe bhi hota hai tavajjoh ka guman
is tarah us ne tavaqqo.a pe lagaya hai mujhe
yuun to fitrat men bhi ashufta-mizaji thi miri
asl men aap ne divana banaya hai mujhe
parda-dari thi use rabt-e-nihan ki manzur
bazm men apni bahut duur biThaya hai mujhe
ye mire zo.am-e-bulandi ki saza hai shayad
us ne kuchh soch ke nazron se giraya hai mujhe
Leave a Reply