Krishna Kumar Toor
us ki chaah men ab ke ye bhi kamal hua
ḳhud se main bahar aaya to ek misal hua
dard ki beḌi shaam se hi baj uThti hai
main to us ke firaq men aur niDhal hua
vo meri tarif ka ab mohtaj nahin
vo chehra to ḳhud hi ek misal hua
ḳhud hi charagh ab apni lau se nalan hai
naqsh ye kya ubhra ye kaisa zaval hua
ab to sannaTa bhi bolta lagta hai
apne aap men ye bhi ek kamal hua
main apni tanha.i se shayad aajiz tha
is aahaT ka varna kaise ḳhayal hua
vo bhi mujh ko bhula ke bahut ḳhush baiTha hai
main bhi us ko chhoḌ ke ‘tur’ nihal hua
Leave a Reply