Uski Chah Mein Ab Ke Ye Bhi Kamal Hua

us kī chaah meñ ab ke ye bhī kamāl huā

ḳhud se maiñ bāhar aayā to ek misāl huā

dard kī beḌī shaam se hī baj uThtī hai

maiñ to us ke firāq meñ aur niDhāl huā

vo merī tārīf kā ab mohtāj nahīñ

vo chehra to ḳhud hī ek misāl huā

ḳhud hī charāġh ab apnī lau se nālāñ hai

naqsh ye kyā ubhrā ye kaisā zavāl huā

ab to sannāTā bhī boltā lagtā hai

apne aap meñ ye bhī ek kamāl huā

maiñ apnī tanhā.ī se shāyad aajiz thā

is aahaT kā varna kaise ḳhayāl huā

vo bhī mujh ko bhulā ke bahut ḳhush baiThā hai

maiñ bhī us ko chhoḌ ke ‘tūr’ nihāl huā

Leave a Comment