ushshaq bahut hain tire bimar bahut hain
tujh husn-e-dil-aram ke haqdar bahut hain
ai sang-sifat aa ke sar-e-bam zara dekh
ik ham hi nahin tere talabgar bahut hain
bechain kiye rakhti hai har aan ye dil ko
kam-baḳht mohabbat ke bhi azar bahut hain
miTTi ke khilaune hain tire haath men ham log
aur gir ke bikhar jaane ke asar bahut hain
likkhen to koi misra-e-tar likh nahin paate
aur ‘ghalib’-e-ḳhasta ke taraf-dar bahut hain
ai rabb-e-hunar chashm-e-inayat idhar bhi
har-chand ki ham tere gunahgar bahut hain
‘ḳhavar’ use pa lene men kho dene ka Dar hai
andesha o hasrat ke miyan ḳhaar bahut hain
Leave a Reply