Wafa Naqvi
koi charagh na jugnu safar men rakkha gaya
dil-o-dimagh ko jab apne ghar men rakkha gaya
khurach khurach ke likha naam ek ḳhushbu ka
kisi ki yaad ko yuun bhi shajar men rakkha gaya
jo ek lamhe ko chamka tha tuur hasti par
vahi to aks hamesha nazar men rakkha gaya
miri nigah ne dekhe nahin khanDar ab tak
mujhe to gaanv se pahle nagar men rakkha gaya
mujhe hi fikr rahi ik ana ke miTne ki
ki ik junun sa mere hi sar men rakkha gaya
tarashti hi rahin us ki ungliyan mujh ko
mira vajud kisi ke hunar men rakkha gaya
ufuq pe phuul vafaon ka jab hua raushan
sisakti shab ke lahu ko sahar men rakkha gaya
Leave a Reply