Koi Charagh Na Jugnu Safar Mein Rakkha Gaya

koī charāġh na jugnū safar meñ rakkhā gayā

dil-o-dimāġh ko jab apne ghar meñ rakkhā gayā

khurach khurach ke likhā naam ek ḳhushbū kā

kisī kī yaad ko yuuñ bhī shajar meñ rakkhā gayā

jo ek lamhe ko chamkā thā tuur hastī par

vahī to aks hamesha nazar meñ rakkhā gayā

mirī nigāh ne dekhe nahīñ khañDar ab tak

mujhe to gaañv se pahle nagar meñ rakkhā gayā

mujhe hī fikr rahī ik anā ke miTne kī

ki ik junūn sā mere hī sar meñ rakkhā gayā

tarāshtī hī rahīñ us kī uñgliyāñ mujh ko

mirā vajūd kisī ke hunar meñ rakkhā gayā

ufuq pe phuul vafāoñ kā jab huā raushan

sisaktī shab ke lahū ko sahar meñ rakkhā gayā

Leave a Comment