Us Mah-Jabin Se Aaj Mulaqat Ho Gai

us mah-jabin se aaj mulaqat ho gai

bedard asman ye kya baat ho gai

avargan-e-ishq ka maskan na puchhiye

pad rahte hain vahin pe jahan raat ho gai

zikr-e-shab-e-visal ho kya qissa mukhtasar

jis baat se vo Darte the vo baat ho gai

masjid ko ham chale gae masti men bhuul kar

ham se khata ye pir-e-kharabat ho gai

pichhle ghamon ka zikr hi kya jab vo mil gae

ai asman talafi-e-mafat ho gai

zahid ko zindagi hi men kausar chakha diya

rindon se aaj ye bhi karamat ho gai

bechain rakhne vaale pareshan hon khud na kyuun

akhir ko teri zulf miri raat ho gai

jhula jhulaen chal ke hasinon ko baagh men

gujrat men suna hai ki barsat ho gai

kya faeda ab ‘akhtar’ agar parsa bane

jab saari umr nazr-e-kharabat ho gai

Leave a Comment