Unki Rukhsat Ek Qayamat Thi Dam-E-Izhaar-E-Subh

un ki ruḳhsat ik qayamat thi dam-e-iz.har-e-sub.h

shaam tak bachta nazar aata nahin bimar-e-sub.h

mujh ko bhi ai shama ro le vasl ki shab hai aḳhir

aur do aansu baha ai kushta-e-azar-e-sub.h

kho diya tul-e-shab-e-furqat ne lutf-e-intizar

dida-e-be-ḳhvab ko hai hasrat-e-didar-e-sub.h

vasl ki shab bujh gaya tha jo hamara dagh-e-dil

mehr ban kar ab vahi hai turra-e-dastar-e-sub.h

sub.h se pahle ulat di us ne chehre se naqab

ab koi kafir bhi kar sakta nahin inkar-e-sub.h

raat bhar meri zaban par sar-guzasht-e-sham-e-gham

un ke lab hain ashna-e-lazzat-e-guftar-e-sub.h

vasl ki be-lutfiyan bhi lutf se ḳhali nahin

raat bhar dil ko maza deti rahi takrar-e-sub.h

iid milne aaen vo gar iid ka nikla hai chand

shaam aae saath le kar daulat-e-bedar-e-sub.h

vasl men hai apni qismat ki ḳhalish bhi yadgar

daman-e-shab se ulajh jaate hain aksar ḳhar-e-sub.h

de subuhi jald saaqi ab nahin mah-e-siyam

be-sabab kyuun raah dekhen shaam ki mai-ḳhvar-e-sub.h

dekhna kya jald guzri hai shab-e-vaada ‘nazar’

vo idhar aae udhar zahir hue asar-e-sub.h

Leave a Comment