umr bhar chalte rahe ham vaqt ki talvar par
parvarish paa.i hai apne ḳhuun hi ki dhaar par
chahne vaale ki ik ghalati se barham ho gaya
faḳhr tha kitna use ḳhud pyaar ke me.aar par
raat gahri meri tanha.i ka sagar aur phir
teri yadon ke sulagte diip har manjdhar par
shaam aa.i aur sab shaḳhon ki galiyan so ga.iin
maut ka saaya sa manDlane laga ashjar par
ḳhalvat-e-shab men ye aksar sochta kyuun huun ki chand
nuur ka bosa hai goya raat ke ruḳhsar par
sal-e-nau aata hai to mahfuz kar leta huun main
kuchh purane se calender zehn ki divar par
zindagi azad pahle yuun kabhi tanha na thi
aadmi bahta tha yunhi vaqt ki raftar par
Leave a Reply