uftad tabi.at se is haal ko ham pahunche
shiddat ki mohabbat men shiddat hi ke gham pahunche
ahval bata.en kya raste ki suna.en kya
ba-halat-e-zar aa.e ba-dida-e-nam pahunche
jis chehre ko dekha vo a.ina-e-duri tha
divar ki surat tha jis dar pe qadam pahunche
kuchh lab pe kuchh ankhon men le aa.e saja kar ham
jo ranj ki haath aa.e jo gham ki baham pahunche
qat-e-sar-e-shaḳh-e-narm aghaz-e-numu-e-nau
sadme miri chahat ko pahunche to pa kam pahunche
vo shaḳh bane-sanvre vo shaḳh phale-phule
jis shaḳh pe dhuup aa.e jis shaḳh ko nam pahunche
Leave a Reply