Anwar Shuoor
ubuur kar na sake ham haden hi aisi thiin
qadam qadam pe yahan mushkilen hi aisi thiin
vo mujh se ruuTh na jaati to aur kya karti
miri ḳhata.en miri laghzishen hi aisi thiin
kahin dikha.i diye ek dusre ko ham
to munh bigaḌ liye ranjishen hi aisi thiin
bahut irada kiya koi kaam karne ka
magar amal na hua uljhanen hi aisi thiin
buton ke samne apni zaban kiya khulti
ḳhuda muaaf kare ḳhvahishen hi aisi thiin
Leave a Reply