tumhen khojti hain jo ankhen…
tum un men kise dekhte ho?
koi gum-shuda muskurahat…
jo dil ke khalaon ko bharne lagi hai
ya ik dhun ki jis par
ye thahri hui munjamid zindagi, raqs karne lagi hai!
tumhare bhi man men parindon ki chahkar phir se utarne lagi hai?
koi bhuli-bisri si sargoshi…
honton pe khilne lagi hai?
kaho! zindagi phir se milne lagi hai?
sunahri vo ankhen jo lau de rahi hain
vo qindil-e-jan hain?
ki bhedon-bhari raushni ka nishan hain?
kabhi taq-e-jan par sambhale the tum ne maani jo gum ho gae the
kaho! tum ne phir bhi unhen pa liya hai?
ki phir ik nai nazm ki khvahishon ne tumhen ja liya hai?
ye kis ko pata hai?
na jaane tum ankhon men un kii…
kise dhundte ho
Leave a Reply