tumhen ḳhabar bhi hai ye tum ne kis se kya manga
bhanvar men Dubne valon se aasra manga
sune jo mere aza.em to azmane ko
hava se barq ne ghar ka mire pata manga
ḳhud apni raah banata gaya pahaḌon men
kabhi kahan kisi dariya ne rasta manga
jo aap apne andheron se bad-havas hui
shab-e-siyah ne ghabra ke ik diya manga
kahin bhi ho koi neki bara.e neki ho
vahin pe ho ga.i zaa.e.a agar sila manga
ḳhuda ki den ke mohtaj-e-bandagan-e-ḳhuda
ye kya ki mangne valon se ja-ba-ja manga
hamen jo ishq men hona tha surḳh-ru ‘ejaz’
to ham ne jan-e-hazin qalb-e-mubtala manga
Leave a Reply