tumhare ishq men ham nang-o-nam bhuul ga.e
jahan men kaam the jitne tamam bhuul ga.e
namaziyon ne tujh abru ko dekh masjid men
ba-samt-e-qibla sujud-o-qayam bhuul ga.e
ye vaz.a kya hai ki hote nahin ho dast-basar
abhi se apnon ka lena salam bhuul ga.e
ga.e the zo.am men apne par us ko dekhte hi
jo dil ne ham se kahe the payam bhuul ga.e
tiri taraf hui surat-garan-e-chin ki nigah
qalam ko haath se rakh apna kaam bhuul ga.e
butan-e-charb-zaban sun ke ḳhubi-e-guftar
adab men dab ga.e husn-e-kalam bhuul ga.e
tiri ai sarv-e-ravan dekh kar anokhi chaal
jo ḳhush-ḳhiram the apna ḳhiram bhuul ga.e
tiri ye zulf-e-girah-gir dekh kar sayyad
shikar aap hue said o daam bhuul ga.e
baḌa ghazab hai ki ‘hatim’ ko tum na pahchana
vahi qadim tumhara ghulam bhuul ga.e
Leave a Reply