tum jis ko DhunDte ho ye mahfil nahin hai vo
logon ke is hujum men shamil nahin hai vo
raston ke pech-o-ḳham ne kahin aur la diya
jaana hamen jahan tha ye manzil nahin hai vo
dariya ke ruḳh ko moḌ ke aa.e to ye khula
sahil ke rang aur hain sahil nahin hai vo
duniya men bhag-dauḌ ka hasil yahi to hai
hasil har ek chiiz hai hasil nahin hai vo
‘alam’ dil-e-asir ko samjha.un kis tarah
kam-baḳht e’tibar ke qabil nahin hai vo
Leave a Reply