Fahmida Riaz
tum bilkul ham jaise nikle
ab tak kahan chhape the bhaai
vo murakhta vo ghamad-pan
jis men ham ne sadi ganvai
akhir pahunchi dvaar tuhare
are badhai bahut badhai
priit dharm ka naach raha hai
qaaem hindu raaj karoge
saare ulte kaaj karoge
apna chaman taraj karoge
tum bhi baithe karoge socha
puuri hai vaisi tayyari
kaun hai hindu kaun nahin hai
tum bhi karoge fatva jaari
hoga kathin yahan bhi jiina
danton aa jaega pasina
jaisi-taisi kata karegi
yahan bhi sab ki saans ghutegi
bhaad men jaae shiksha-viksha
ab jahil-pan ke gun gaana
aage gadha hai ye mat dekho
vapas laao gaya zamana
mashq karo tum aa jaega
ulte paanv chalte jaana
dhyan na duuja man men aae
bas pichhe hi nazar jamana
ek jaap sa karte jaao
baram-bar yahi doharao
kaisa viir mahan tha bharat
kitna ali-shan tha bharat
phir tum log pahunch jaoge
bas parlok pahunch jaoge
ham to hain pahle se vahan par
tum bhi samay nikalte rahna
ab jis nark men jaao vahan se
chitthi-vitthi dalte rahna
Leave a Reply