Nasir Shahzad
tujh se milne ki iltija kaisi
honT par aa ga.i dua kaisi
jhaḌ ga.e baal Dhili paḌ ga.i khaal
dil men ab ḳhushbu-e-hina kaisi
sej kya hai baghair sayyan ke
paniyon ke binan ghaTa kaisi
dil men dar aana dil ko kalpana
daan kaisa hai ye daya kaisi
koi hangama koi sar-nama
varna is ziist men baqa kaisi
rishvaten rahzani Dakaiti qatl
lag ga.i shahr ko hava kaisi
harf-e-haq zarf-e-ka.enat bana
karbala ho ga.i katha kaisi
shabd shobha sakhi tiri lobha
tu sakhi mujh se mavara kaisi
intiha shauq ki tarah milna
tujh se milne ki intiha kaisi
jal men Thahra tira mira chehra
kaisa dariya tha vo sabha kaisi
Leave a Reply