Tu KHafa Mujhse Hua Kya Bais

Poet

tu ḳhafa mujh se hua kya baa.is

jurm kya mujh se hua kya baa.is

kis liye dushman-e-jan hai tu gunah

kaun-sa mujh se hua kya baa.is

kyon dil-azar hai tu koi qusur

dil se ya mujh se hua kya baa.is

bas main us but ke jo Daala hai gunah

kya ḳhuda mujh se hua kya baa.is

kya jihat kya hai sabab kya maujib

tu juda mujh se hua kya baa.is

aaj vo lo.bat-e-chin chin-ba-jabin

be-ḳhata mujh se hua kya baa.is

raat ‘be-sabr’ vo barham nahaq

na-rava mujh se hua kya baa.is