Kisi but Ke Shikam Se Gar Koi Aazar Nikal Aae

Khalid Jamal

kisi but ke shikam se gar koi aazar nikal aa.e

ḳhirad ka band TuuTe aur ik patthar nikal aa.e

taqaze jab badan ke ruuh men Dhal kar nikal aa.e

qaba ke band TuuTe aur hasin bistar nikal aa.e

zamana na-shanasi ka muravvat be-ḳhayali ki

na jaane kis gali kis moḌ par ḳhanjar nikal aa.e

uge hain ḳhvab-zaron men manazir sar-tarashi ke

suhani vadiyon men bavle lashkar nikal aa.e

thakan ka bojh le kar koi kitni duur chalta hai

magar jab raah men ik miil ka patthar nikal aa.e

chhupa kar jin charaghon ko nihan-ḳhane men rakkha tha

fasil-e-jan pe jalne ke liye kyuun kar nikal aa.e