Thokar Se Faqiron Ki duniya Ka Bikhar Jaana

Afroz Alam

thokar se faqiron ki duniya ka bikhar jaana

khvahish ka laraz jaana asbab ka dar jaana

akash ke mathe pe jaadu ka sabab ye hai

taron ka chamak jaana chanda ka nikhar jaana

aa tujh ko bata duun main achchhi si ghazal kya hai

afkar ke sanche men lafzon ka utar jaana

iqrar-e-mohabbat ki nazuk si dalilen hain

ankhon men chamak aana zulfon ka sanvar jaana

be-rabt dalilen hain us shokh ki baton men

kuchh der talak kahna phir kah ke mukar jaana

duniya jise kahti hai vo nil-kamal tum ho

har jhiil ko jachta hai tira khil ke ubhar jaana

tum meri zarurat ho ‘alam’ yahi kahta hai

is baat ka matlab hai tire bin mira mar jaana