tire ashufta se kya hal-e-betabi bayan hoga
jabin-e-shauq hogi aur tera astan hoga
zaban-e-sham-e-mahfil se suna hai ahl-e-mahfil ne
tira anjam kya parvana-e-atish-ba-jan hoga
talatum hai umidon ka tasadum arzuon ka
dil-e-hangama-parvar kaun tera razdan hoga
rahen yunhi agar ranginiyan tarz-e-tabassum ki
mire zaḳhm-e-jigar par ḳhanda-e-gul ka guman hoga
tajammul se guzar hoga tire kuche men ashiq ka
tamannaon ka lashkar karvan-dar-karvan hoga
kabhi taufiq tark-e-ma-siva ki ho hi ja.egi
dil-e-azad hoga aur aish-e-javedan hoga
surur-afza-o-masti-ḳhez-o-shorish-afrin hogi
vo bazm-e-sher jis men ‘vahshat’-e-sheva-bayan hoga
Leave a Reply