Mohammad Yusuf Rasikh
taare khile hue hain shab-e-mahtab hai
ma.ashuq ham-piyala hai bazm-e-sharab hai
ye kya sitam hai vasl men munh par naqab hai
qurban is haya ke ye kaisa hijab hai
baiThe ho mere samne pahlu men ghair ke
phir mujh se puchhte ho tumhen kyuun itaab hai
ye faiz hai mire araq-e-infi.al ka
nar-e-jahim mere liye aab aab hai
tasvir-e-ghair bhej ke us ne ba-laff-e-ḳhat
unvan ye likh diya tire ḳhat ka javab hai
kyuun chheḌte hain mujh ko nakirain qabr men
jo so raha ho us ko jagana azaab hai
is ke bhi mustahiq nahin aghyar na-ba-kar
gaali bhi aap den to vo durr-e-ḳhushab hai
mujh ko nahin hai sham.a ki hajat sar-e-mazar
mera har ek dagh-e-jigar aftab hai
tum to farogh-e-husn men bar-ḳhud ghalat rahe
main ne na kah diya tha ye dhoka hai ḳhvab hai
ka.aba jo ik buton ka purana maqam tha
zahid vahan ke shauq men padar-rikab hai
bhule hue ho ahd-e-javani pe kis liye
is se to pa.edar ziyada habab hai
rusva mire kiye se na hoga vo hashr men
us ka sharik ye dil-e-ḳhana-ḳharab hai
phande men phans gaya dil-e-nadan hazar haif
kis ko ḳhabar thi zulf tumhari tanab hai
kyuun tum ne mere ḳhat ke parḳhache uḌa diye
naraz ho to mujh se ho mujh par itaab hai
ham ko nahin hai jis lab-e-nazuk se faiz kuchh
ho vo jo ḳhush-numa.i men barg-e-gulab hai
mutrib ne raag chheḌa hai aa kar shab-e-firaq
kya dil-ḳharash naghma-e-chang-o-rabab hai
‘rasiḳh’ mila hai apni riyazat ka phal mujhe
naḳhl-e-suḳhan jo aaj mira baryab hai
Leave a Reply