sulagti ret pe ankhen bhi zer-e-pa rakhna
nahin hai sahl hava se muqabla rakhna
use ye zom ki aghosh-e-gul bhi us ki hai
jo chahta hai parindon ko be-nava rakhna
subuk na ho ye nigah-dari-e-junun ham se
ye dekhne ko use samne bitha rakhna
bikhar na jaana jarahat-navazi-e-shab par
masham-e-jan ko abhi ḳhvab ashna rakhna
vo fursaten ki jinhen ahaton ki ḳhvahish ho
unhen jaras ki tamanna se ma-siva rakhna
tamam manzar-e-jan us ki ḳhvahishon se bana
vo ḳhvab hai to use ḳhvab men saja rakhna
udasiyon ko to angan hi chahiye ḳhali
chhaton pe chandni raton ka silsila rakhna
vo jab bhi aaya bahut tez barishon jaisa
vo jis ne chaha mujhe surmai ghata rakhna
bas ik charagh masafat ka bojh sah lega
suḳhan ke biich talabgari-e-vafa rakhna