Kishwar Naheed
mujhe november ki dhuup ki tarah mat chaho
ki is men duubo to tamazat men naha jaao
aur is se alag ho to
thandak ko por por men utarta dekho
mujhe savan ke badal ki tarah chaho
ki us ka saaya bahut gahra
nas nas men pyaas bujhane vaala
magar us ka vajud pal men hava
pal men paani ka dher
mujhe shaam ki shafaq ki tarah mat chaho
ki asman ke qurmuzi rangon ki tarah
mere gaal surkh
magar lamha-bhar baad
hijr men naha kar, raat si maili maili
mujhe chalti hava ki tarah mat chaho
ki jis ke qayam se dam ghutta hai
aur jis ki tez-ravi qadam ukhed deti hai
mujhe thahre paani ki tarah mat chaho
ki main is men kanval ban ke nahin rah sakti huun
mujhe bas itna chaho
ki mujh men chahe jaane ki khvahish jaag uthe!
Leave a Reply