ali-sardar-jafri

Sitaron Ke Payam Aae Bahaaron Ke Salam Aae

sitaron ke payam aae baharon ke salam aae

hazaron nama-ha-e-shauq ahl-e-dil ke kaam aae

na jaane kitni nazren us dil-e-vahshi pe padti hain

har ik ko fikr hai us ki ye shahin zer-e-dam aae

isi ummid men betabi-e-jan badhti jaati hai

sukun-e-dil jahan mumkin ho shayad vo maqam aae

hamari tishnagi bujhti nahin shabnam ke qatron se

jise saqi-gari ki sharm ho atish-ba-jam aae

koi shayad hamare dagh-e-dil ki tarah raushan ho

hazaron aftab is shauq men bala-e-bam aae

inhen rahon men shaikh-o-muhtasib haail rahe akasr

inhen rahon men huran-e-bahishti ke khiyam aae

nigahen muntazir hain ek khurshid-e-tamanna ki

abhi tak jitne mehr-o-mah aae na-tamam aae

ye aalam lazzat-e-takhliq ka hai raqs-e-lafani

tasavvur-khana-e-hairat men lakhon subh-o-sham aae

koi ‘sardar’ kab tha is se pahle teri mahfil men

bahut ahl-e-sukhan utthe bahut ahl-e-kalam aae

More Poems

Leave a Comment