Poet
siina to dhund liya muttasil apna ham ne
nahin malum diya kis ko dil apna ham ne
ahd kya kar ke tire dar se uthe the qismat
phir dikhaya tujhe ru-e-khajil apna ham ne
meri aludgiyon se na kar ikrah ai shaikh
kuchh banaya to nahin ab-o-gil apna ham ne
sakht kafir ka dil afsos na sharmaya kabhi
puuja juun but to bahut sang-dil apna ham ne
paani pahuncha sake jab tak miri chashm-e-namnak
jal bujha paaya dil-e-mushtail apna ham ne
baad sau ranjish-e-beja ke na paaya ba-ghalat
na pashiman tujhe munfail apna ham ne
dar gharibi na tha kuchh aur mayassar ‘hasrat’
ishq ki nazr kiya diin o dil apna ham ne
Leave a Reply