Simat Na Pae Ki Har-Su Bikhar Gae The Hum

simat na paae ki har-su bikhar gae the ham

hujum-e-yas men kya soch kar gae the ham

hue the raakh to kuchh rasta hi aisa tha

dabi thi aag zamin men jidhar gae the ham

ye kya ki phir se yahan hukmarani-e-shab hai

hisar-e-shab to abhi tod kar gae the ham

vo kya khushi thi ki barbad kar gai sab kuchh

vo kaisa gham tha ki jis se sanvar gae the ham

mili thiin phir bhi vo divaren ajnabi ban kar

agarche shaam se pahle hi ghar gae the ham

ghire the maslahat-andesiyon men puuri tarah

jo dil ka saath na dete to mar gae the ham

Leave a Comment