shauq baaqi nahin baaqi nahin ab josh-o-ḳharosh
din vo pur-kaif the jab ham the sarasar mad.hosh
maslahat josh-e-baghavat ko daba deti hai
dil dhaḌakta hai magar dil ki sada.en ḳhamosh
ab koi surat-e-guftar nazar aati nahin
vo bhi ḳhamosh mira radd-e-amal bhi ḳhamosh
teri raftar lagatar ho kachhue ki tarah
varna rah ja.ega tu raah men misl-e-ḳhargosh
ziist ki raah pe tanha na kabhi chal paaya
gham-e-janan gham-e-dauran bhi rahe dosh-ba-dosh
samna dahr ka tanha use ab karne de
paanv men beTe ke aane lage teri pa-posh
bazm-e-urdu se hui der bahut aa.e hue
ab talak saans men ḳhushbu hai mo.attar hain gosh
ab to ghar-bar men lagta hi nahin dil ‘azam’
aisa lagta hai ki ho ja.enge ham ḳhana-ba-dosh
Leave a Reply