Jaleel Hashmi
shaḳhcha ḳhak-e-gulistan men paḌa hai yaaro
us se ehsan-e-baharan na uTha hai yaaro
tum ne puchha hai na kuchh ham ne kaha hai yaaro
hadisa ham pe jo guzra hai to kya hai yaaro
kar gaya ḳhaak hamen ruḳhsat-e-gul ka manzar
zaḳhm-e-nazzara magar ab bhi hara hai yaaro
maryam-e-sham khule baal phir aati dekho
phir masiha koi suuli pe chaḌha hai yaaro
raat andheri sahi mayus nahin nuur se ham
ashk palkon pe abhi kaanp raha hai yaaro
ab miri shab mire ashkon se rahegi raushan
shaam ke vaqt diya mera bujha hai yaaro
samne aate ho ab ajnabiyon ki surat
ye bhi shayad koi yaari ki ada hai yaaro
paanv hain ḳhaak pe ḳhurshid pe saaya us ka
‘hashami’ khoj men ye kis ki chala hai yaaro
Leave a Reply