shab ke pur-haul manazir se bacha le mujh ko
main tiri niind huun ankhon men chhupa le mujh ko
main tiri rah-e-mashi.at ka huun zarra lekin
DhunDhne vaala sitaron men khangale mujh ko
ḳhauf ankhon men miri dekh ke chingari ka
kar diya raat ne suraj ke havale mujh ko
main musavvir huun bure vaqt ki tasviron ka
raas aate hain ye divar ke jaale mujh ko
umr bhar jis ke liye peT se bandhe patthar
ab vo gin gin ke khilata hai nivale mujh ko
beḌiyan Daal ke parchha.in ki pairon men mire
qaid rakhte hain andheron men ujale mujh ko
tere hathon ka tarasha hua patthar huun ‘salim’
a.ina ho ga.e sab dekhne vaale mujh ko
Leave a Reply