Poet
saare aalam men teri khushbu hai
ai mere rashk-e-gul kahan tu hai
barchhi thi vo nigah dekho to
lahu ankhon men hai ki aansu hai
ek dam men hazar daftar tai
chashm-e-hasrat ghazab sukhan-go hai
tu hi tu aur baal baal apna
fakhta aur shor-e-ku-ku hai
tujh ko dekhe phir aap men rah jaae
dil par itna kisi ko qaabu hai
josh-e-ashk o tasavvur-e-qad-e-yar
sarv goya khada lab-e-ju hai
had na puchho hamari vahshat ki
dil men har daagh chashm-e-ahu hai
jis ne momin bana liya ham ko
vo tumhara hi mus.haf-e-ru hai
jis ke kushte hain zinda-e-javed
vo tumhari hi tegh-e-abru hai
dil jo be-muddaa ho kya kahna
yahi virana alam-e-hu hai
pul bhi hai fakhr-e-jaunpur ‘asi’
khvab-gah-e-janab-e-shekhu hai
Leave a Reply