Ayub Khawar
safar men faslon ke saath badban kho diya
utar ke paniyon men ham ne asaman kho diya
yahi ki in nafas-ghubar sa.aton ke darmiyan
hava ne giit rah-guzar ne sarban kho diya
ye kaun savanon men ḳhvab dekhta hai dhuup ke
ye kis ne e’tibar-e-gham pas-e-guman kho diya
bas ek harf ka gudaz us pe qarz tha so vo
bichhaḌte vaqt ḳhamushi ke darmiyan kho diya
firaq manzilon ka ik ghubar tha ki jis ghaḌi
charagh-e-shab ne aur dil ne mehman kho diya
ruton men ek rut yahan shajar bhi kaTne ki thi
pata chala jab apne ghar ka pasban kho diya
bacha liya tha ḳhvab jo masafaton ki dhuup se
vo abr-o-bad manzaron ke darmiyan kho diya
vo niind apne bachpane ki raah men ujaḌ ga.i
us aankh ne bhi mojazon ka ik jahan kho diya
Leave a Reply