safar hai ḳhatm magar be-ghari na ja.egi
hamare ghar se ye paighambari na ja.egi
nazar ganva bhi chuke tujh ko dekhne vaale
ufuq ufuq tiri jalva-gari na ja.egi
main apne ḳhvab tarashun inhen bikherun bhi
miri sarisht se ye azari na ja.egi
hasin hai shisha-o-ahan ka imtizaj magar
tiri siyasat-e-ahan-gari na ja.egi
main sab ke zaḳhm chunun phir unhen zabanen duun
bala se dil ki mire abtari na ja.egi
agarche sard bahut hai dayar-e-qutub-e-shumal
suḳhan-varon ki suḳhan-parvari na ja.egi
Leave a Reply