Rais Farogh
saḌkon pe ghumne ko nikalte hain shaam se
aaseb apne kaam se ham apne kaam se
nashshe men Dagmaga ke na chal siTiyan baja
shayad koi charagh utar aa.e baam se
dam kya laga liya hai ki saare dukan-dar
chakhne men lag rahe hain mujhe tursh aam se
ghusse men dauḌte hain Trak bhi lade hue
main bhi bhara hua huun bahut intiqam se
dushman hai ek shaḳhs bahut ek shaḳhs ka
haan ishq ek naam ko hai ek naam se
mere tamam aks mire karr-o-farr ke saath
main ne bhi sab ko dafn kiya dhum-dham se
mujh be-amal se rabt baḌhane ko aa.e ho
ye baat hai agar to ga.e tum bhi kaam se
Dar to ye hai hui jo kabhi din ki raushni
us raushni men tum bhi lagoge avaam se
jis din se apni baat rakhi sha.eri ke biich
main kaT ke rah gaya sho.ara-e-karam se
Leave a Reply