ru-ba-ru gham ke ye taqdir kahan se aa.i
aur hatheli ki ye tahrir kahan se aa.i
dil ke goshe men jise main ne chhupa rakkha tha
tere album men vo tasvir kahan se aa.i
dabi ḳhvahish ka tha iz.har-e-tamasha goya
ḳhvab tha ḳhvab ye ta.abir kahan se aa.i
fan ko maidan khula chahiye jiine ke liye
raqs ki raah men zanjir kahan se aa.i
zindagi ke abhi asar hain baaqi varna
daur-e-taḳhrib men ta.amir kahan se aa.i
DhunDne nikle the ham maut ke ma.ani lekin
zindagi ki na.i tafsir kahan se aa.i
is ko aadam hi ki taqsir ka samra kahiye
varna jannat ki ye jagir kahan se aa.i
vaqt ka sail ‘karamat’ tujhe le Duuba tha
yak-ba-yak ye tiri tadbir kahan se aa.i
Leave a Reply