riha karna nahin un ko unhen abad rakhna hai
sunahri ḳhvahishon ko qaid men dil-shad rakhna hai
vo din bhi yaad rakhna hai abhi jo kal hi biita hai
jo ab maazi ka hissa hai hamesha yaad rakhna hai
ḳhuda ḳhud bastiyon ke faisle karta hai hikmat se
kise abad rakhna hai kise barbad rakhna hai
bahut se log a.enge tumhari zindagani men
magar har-dam kisi ke ḳhal-o-ḳhad ko yaad rakhna hai
koi mausam ho koi imtihan-e-ranj-o-rahat ho
hamen to ‘shahida’ har haal men dil-shad rakhna hai
Leave a Reply