Poet
ra.unaton men na itni bhi intiha ho jaa.e
ki aadmi na rahe aadmi ḳhuda ho jaa.e
usi ke paas ho sab iḳhtiyar bolne ka
aur us ke samne har shaḳhs be-sada ho jaa.e
ghire hue hain ajab ahd-e-be-yaqini men
ḳhabar nahin ki kahan kis ke saath kya ho jaa.e
kahan kahan se uTha.e saron ki fasl koi
tamam shahr hi jab dasht-e-karbala ho jaa.e
ab is se baḌh ke tire saath kya mohabbat ho
main tujh ko yaad karun aur samna ho jaa.e
ta.alluqat men gunja.ishen to hoti hain
zara si baat pe kya aadmi ḳhafa ho jaa.e
ham ahl-e-harf baḌe sahab-e-karamat hain
hamare haath men patthar bhi aa.ina ho jaa.e
ham ik ishare se ruḳh moḌ den havaon ka
nazar karen to samundar men rasta ho jaa.e
kabhi to manzil-e-sub.h-e-yaqin mile ‘arif’
kahin to ḳhatm gumanon ka silsila ho jaa.e
Leave a Reply