Jaleel Aali
rasta sochte rahne se kidhar banta hai
sar men sauda ho to divar men dar banta hai
aag hi aag ho siine men to kya phuul jhaḌen
shola hoti hai zaban lafz sharar banta hai
zindagi soch azabon men guzari hai miyan
ek din men kahan andaz-e-nazar banta hai
mudda.i taḳht ke aate hain chale jaate hain
shahr ka taaj koi ḳhak-basar banta hai
ishq ki raah ke meyar alag hote hain
ik juda za.icha-e-nafa-o-zarar banta hai
apna iz.har asir-e-ravish-e-am nahin
jaise kah den vahi meyar-e-hunar banta hai
Leave a Reply