rañgīnī-e-bahār-e-tamannā liye hue
baiThā huuñ dil meñ shauq kī duniyā liye hue
ye ġhairat-e-junūñ ko gavārā nahīñ ki maiñ
uTThūñ tire karam kā sahārā liye hue
tāb-e-nigāh sāz-e-vafā soz-e-zindagī
uTThā huuñ terī bazm se kyā kyā liye hue
khāte rahe fareb sañbhalte rahe qadam
chalte rahe junūñ kā sahārā liye hue
‘shāriq’ idhar hai silsila-e-dīd-o-bāz-dīd
jalve udhar haiñ husn-e-taqāzā liye hue