rangini-e-bahar-e-tamanna liye hue
baiTha huun dil men shauq ki duniya liye hue
ye ghairat-e-junun ko gavara nahin ki main
uTThun tire karam ka sahara liye hue
tab-e-nigah saz-e-vafa soz-e-zindagi
uTTha huun teri bazm se kya kya liye hue
khate rahe fareb sanbhalte rahe qadam
chalte rahe junun ka sahara liye hue
‘shariq’ idhar hai silsila-e-did-o-baz-did
jalve udhar hain husn-e-taqaza liye hue
Leave a Reply