Rais Ashkon Se Daman Ko Bhigo Lete to Achchha Tha

Rais Amrohvi

‘ra.is’ ashkon se daman ko bhigo lete to achchha tha

huzur-e-dost kuchh gustaḳh ho lete to achchha tha

juda.i men ye shart-e-zabt-e-gham to maar Dalegi

ham un ke samne kuchh der ro lete to achchha tha

baharon se nahin jin ko tavaqqo.a lala-o-gul ki

vo apne vaste kanTe hi bo lete to achchha tha

abhi to nisf shab hai intizar-e-sub.h-e-nau kaisa

dil-e-bedar ham kuchh der so lete to achchha tha

qalam-rau dad-e-ḳhun-o-ashk likhne se jhijakta hai

qalam ko ashk-o-ḳhun hi men Dubo lete to achchha tha

faqat ik girya-e-shabnam kifayat kar nahin sakta

chaman vaale kabhi ji-bhar ke ro lete to achchha tha

suragh-e-karvan tak kho gaya ab sochte ye hain

ki gard-e-karvan ke saath ho lete to achchha tha