rahe jo zindagi men zindagi ka aasra ho kar
vahi nikle sarir-ara qayamat men ḳhuda ho kar
haqiqat-dar-haqiqat but-kade men hai na kaabe men
nigah-e-shauq dhoke de rahi hai rahnuma ho kar
ma.al-e-kar se gulshan ki har patti larazti hai
ki aḳhir rang-o-bu uḌ ja.enge ik din hava ho kar
abhi kal tak javani ke ḳhumistan the nigahon men
ye duniya do hi din men rah ga.i hai kya se kya ho kar
mire sajdon ki ya rab tishna-kami kyuun nahin jaati
ye kya be-e’tina.i apne bande se ḳhuda ho kar
sirisht-e-dil men kis ne kuuT kar bhar di hai betabi
azal men kaun ya rab mujh se baiTha tha ḳhafa ho kar
ye pichhli raat ye ḳhamoshiyan ye Dubte taare
nigah-e-shauq bahki phir rahi hai iltija ho kar
bala se kuchh ho ham ‘ehsan’ apni ḳhu na chhoḌenge
hamesha be-vafaon se milenge ba-vafa ho kar
Leave a Reply