rah-e-ishq-o-vafa hai aur main huun
ye tera naqsh-e-pa hai aur main huun
nigahon men hai zanjir-e-mohabbat
tiri zulf-e-dota hai aur main huun
shab-e-aḳhir faza-e-dil men phaili
ḳhamoshi ki rida hai aur main huun
yahi hai muḳhtasar si apni duniya
ye mera aa.ina hai aur main huun
vahi hai hijr ki rut ki udasi
vahi qatil hava hai aur main huun
nazar men hai koi ḳhun-rez manzar
koi zaḳhmi sada hai aur main huun
ḳhuda hi jaane hone vaala kya hai
tiri qatil ada hai aur main huun
mujhe kya lena dena hai jahan se
ḳhayal-e-dil-ruba hai aur main huun
vahi hai badiya-paima.i apni
vahi ab-o-hava hai aur main huun
Leave a Reply