raat din mahbus apne zahiri paikar men huun
shola-e-muztar huun main lekin abhi patthar men huun
apni sochon se nikalna bhi mujhe dushvar hai
dekh main kis be-kasi ke gumbad-e-be-dar men huun
dekhte hain sab magar koi mujhe paḌhta nahin
guzre vaqton ki ibarat huun aja.ib-ghar men huun
jurm karta hai koi aur sharm aati hai mujhe
ye saza kaisi hai main kisi arsa-e-mahshar men huun
tujh ko itna kuchh banane men mira bhi haath hai
meri janib dekh main bhi tere pas-manzar men huun
mera dukh ye hai main apne sathiyon jaisa nahin
main bahadur huun magar haare hue lashkar men huun
kaun mera pujne vaala hai jo aage baḌhe
main akela devta jalte hue mandar men huun
Leave a Reply