Shariq Kaifi
raat be-parda si lagti hai mujhe
ḳhauf ne aisi nazar di hai mujhe
aah is ma.asum ko kaise bata.un
kyuun use khone ki jaldi hai mujhe
josh men hain is qadar timardar
Thiik hote sharm aati hai mujhe
ik latifa jo samajh men bhi na aa.e
us pe hansna kyuun zaruri hai mujhe
muntashir hone lage saare ḳhayal
niind bas aane hi vaali hai mujhe
ab junun kam hone vaala hai mira
ḳhair itni to tasalli hai mujhe
laakh maddham ho tiri chahat ki lau
raushni utni hi kaafi hai mujhe
gard hai barud ki sar men to kya
maut ik afvah lagti hai mujhe
Leave a Reply