Ahmad Nadeem Qasmi
chalo ik raat to guzri
chalo saffak zulmat ke badan ka ek tukda to kata
aur vaqt ki be-intihai ke samundar men
koi tabut girne ki sada aai
ye maana raat ankhon men kati
ek ek pal but sa ban kar jam gaya
ik saans to ik sadi ke baad phir se saans lene ka khayal aaya
ye sab sach hai ki raat ik karb-e-be-payan thi
lekin karb hi takhliq hai
ai pau phate ke dilruba lamho gavahi do
yunhi katti chali jaengi raten
aur phir vo aftab ubhrega
jo apni shuaon se abad ko raushni bakhshega
phir koi andheri dharti ko na chhu paega
danayan-e-mazhab ke mutabiq hashr aa jaega
lekin hashr bhi ik karb hai
har karb ik takhliq hai
ai pau phate ke dilruba lamho gavahi do
Leave a Reply