pyaar apne pe jo aata hai to kya karte hain
aina dekh ke munh chuum liya karte hain
vasl ka lutf mujhe vasl se pahle hi mila
jab kaha yaar ne ghabra ke ye kya karte hain
is qadar tha mujhe ulfat men bharosa un par
ki jafa bhi to ye samjha ki vafa karte hain
hai yahi arz khuda se ki fulan but mil jaae
vahi achchhe jo namazon men dua karte hain
lab kisi ke jo hile kaan udhar dhyan udhar
dil laga kar vo mira zikr suna karte hain
subah ko dekh ke aine men bose ka nishan
muskurate hue honton men gila karte hain
kaise kaise mujhe be-sakhta milte hain khitab
ghussa aata hai to kya kya vo kaha karte hain
kya hua mujh ko raqibon ne agar di tazim
teri mahfil men to fitne hi utha karte hain
kaan baton ki taraf aankh hai kamon ki taraf
ho ke anjan mira zikr suna karte hain
chiin peshani pe hai mauj-e-tabassum lab men
aise hansmukh hain ki ghusse men hansa karte hain
bas to chalta nahin kuchh kah ke unhen kyuun hon zalil
ham to apna hi lahu aap piya karte hain
is ishare ke fida aise tajahul ke nisar
maar kar aankh vo munh pher liya karte hain
jalse hi jalse hain jab se vo hue khud-mukhtar
koi itna nahin kahta ki ye kya karte hain
ashiqana hai aqida bhi hamara ‘mail’
le ke ham nam-e-butan zikr-e-khuda karte hain
Leave a Reply