puchh mat kitni pareshani hua karti hai
jab bhare shahar men virani hua karti hai
tere siine se laga huun to khula hai mujh par
saans lene men bhi asani hua karti hai
chand ik phuul hi hote hain bhare gulshan men
jin ke jhaḌne pe pashemani hua karti hai
ye jo darvesh nazar aate hain bhuke pyase
un ke pairon tale sultani hua karti hai
duur mat bhaag na Dar jhulse hue peḌ hain ham
apni ḳhvahish to faqat paani hua karti hai
Leave a Reply