Rehman Musawwir
pichhli shab ḳhvab mohabbat ka dikhaya gaya tha
sub.h main peḌ se laTka hua paaya gaya tha
un pe zahir tha mira ishq-e-husaini tabhi to
tapte sahra men mujhe dhoke se laaya gaya tha
ek bahre ko sunaya gaya farman-e-tarab
ek andhe ko ishare se bulaya gaya tha
us hatheli pe ugaa.e ga.e zaḳhmon ke gulab
jis hatheli pe naya ḳhvab sajaya gaya tha
pahle suraj kiya karta tha zamin ki gardish
phir zamin ko bhi usi tarah ghumaya gaya tha
dekhne vaala tha manzar vo khuli ankhon se
jab main zanjir-ba-kaf shahar men laaya gaya tha
Leave a Reply