paaya tire kushton ne jo maidan-e-bayaban
shan-e-chaman-e-khuld hui shan-e-bayaban
divana tira mar ke hua zinda-e-javed
ruuh us ki jo nikli to hui jan-e-bayaban
mujh sa bhi jahan men koi saudai na hoga
samjha lahad-e-qais ko aivan-e-bayaban
virana-nashini hai azal se miri jagir
qismat ne diya hai mujhe farman-e-bayaban
vahshat pe miri ahuon ke bahte hain aansu
hairat pe miri rote hain haivan-e-bayaban
hai alam-e-hu turbat-e-majnun ka mujavar
sannate ka aalam hai nigahban-e-bayaban
jis roz mire hosh ke ham-rah udenge
dam tod ke mar jaenge murghan-e-bayaban
ik din hi ye mauquf hua khaak ka udna
kya kya na kiya qais ne saman-e-bayaban
parva na thi basti ki na thi yaad vatan ki
allah re mad-hoshi-o-nisyan-e-bayaban
rahte hain mire gird pari-zad hazaron
huun alam-e-vahshat men sulaiman-e-bayaban
laila pe jo aalam hai to majnun bhi hai khush-ru
vo hur-e-bayaban hai vo ghilman-e-bayaban
is tabqe ki manzur jo ki tum ne tabahi
barbadi hui dast-o-gareban-e-bayaban
afsos hai is najd ko majnun ne basaya
laila jise kahti hai bayaban-e-bayaban
dil khol ke ji chahta hai khaak udaun
phirne ko mila hai mujhe maidan-e-bayaban
jis din se bani hai tire divane ki turbat
hote hain pari-zad bhi qurban-e-bayaban
sheron ke hila daale hain dil us ke junun ne
majnun hai ki hai rustam-e-dastan-e-bayaban
jis vaqt ‘sharaf’ laila o majnun ne qaza ki
ik ghul hua rukhsat hue mehman-e-bayaban