Patthar Bana Kar Arsh Se Phenka Gaya Tha Ek Main

Kavish Badri

patthar bana kar arsh se phenka gaya tha ek main

shayad ḳhuda se pahle hi puuja gaya tha ek main

taḳhliq-kari men tujhe hasil maharat hai magar

kis inhimak-o-shauq se socha gaya tha ek main

tifli se piiri tak mire ahval sun lena kabhi

vaqt-e-viladat hi bahut kosa gaya tha ek main

naqsh-e-qadam bhi aap ka ik saanp ka phan hi laga

saya-numa ḳhanjar se hi maara gaya tha ek main

din sa-re-ga-ma men kaTa shab pa-dha-ni-sa men kaTi

nikli surili ek vo kaan ashna tha ek main

kashkol bhi ban ja.egi ik roz apni khopaḌi

miTTi ke bartan ki tarah barta gaya tha ek main

gaa.ek hua sha.ir hua ashiq hua suufi hua

divane-pan ki had na thi kya kya bana tha ek main

kya tum hi ‘kavish’ ho miyan kuchh e.atibar aata nahin

allah-miyan hi ek hain kahte ho kyuun tha ek main