bahar-e-husn javan-marg surat-e-gul-e-tar
misal-e-khar magar umr-e-dard-e-ishq daraz
vo vidyapati ki shairi ki
masum-o-hasin-o-shokh radha
vo apne khayal ka kanhaiya
in shahron men dhundne gai thi
dastur tha jin ka sang-bari
vo ‘faiz’-o-‘firaq’ ziyada
taqdis-e-badan ki naghma-khvan thi
tahzib-e-badan ki raz-dan thi
gulnar badan ki tahniyat men
gulnar labon se gul-fishan thi
lab-ashna lab ghazal ke misre
jism-ashna jism nazm-paikar
lafzon ki hatheliyan hinai
tashbihon ki ungliyan gulabi
sarsabz khayal ka gulistan
mubham se kuchh ansuon ke chashme
aahon ki vo halki si havaen
sad-barg hava men muntashir the
titli thi ki raqs kar rahi thi
aur dard ke badalon se chhan kar
naghmon ki phuvare pad rahi thi
pur-shor munafiqat ke bazar
afvahen farokht kar rahe the
vo apni shikasta shakhsiyat ko
ashar ki chadaron ke andar
is tarah sametne lagi thi
ehsas men aa rahi thi vusat
nazron ka ufuq badal raha tha
aur dard-e-jahan-e-adamiyat
tuute hue dil men dhal raha tha
is alam-e-kaif-o-kam men ik din
ik hadse ka shikar ho kar
jab khuun ka kafan pahan liya to
udtin saliben nauha-khvan thiin
khamosh tha karb-e-khud-kalami
ab kuchh nahin rah gaya hai baaqi
baaqi hai sukhan ki dil-navazi
2
jannat men hai jashn-e-nau ka saman
mahfil men ‘majaz’-o-‘bairan’ hain
maujud hain ‘keats’ aur ‘shaili’
ye marg-e-javan ke saare ashiq
khush hain ki zamin-e-pak se ik
nau-marg-e-bahar aa gai hai
lipti hui khaak ki hai khushbu
aur saya-fagan sahab-e-rahmat
Leave a Reply