Pahuncha Hai Uske Pas Ye Aaina Tut Ke

pahuncha hai us ke paas ye aina tuut ke

kis se mila hai shisha-e-dil ham se phuut ke

husn-e-malih ka na kiya zakhmiyon ne shukr

ai kirdgar nikle namak phuut phuut ke

sar phod kar mue jo tire sang-e-dar se ham

rah rah gae hasin bhi mathon ko kuut ke

be-nur hone par bhi vahi josh-e-girya hai

ankhen hamari aur bahin phuut phuut ke

ai rashk-e-mah raat ko mutthi na kholna

mehndi ka chor haath se jaae na chhut ke

tadbir zahr dene ki hai paemalon ko

hiire lagae jaate hain pannon men boot ke

dil le ke palken phir gaiin zulfon ki aad men

ulti phiri ye fauj sar-e-sham luut ke

mauzun karenge vasf dikhao phaketiyan

jaane na paaen haath se mazmun chhut ke

dete hain mere samne ghairon ko kharpuze

bagh-e-jahan men aap hain mushtaq phuut ke

kanghi se zulf uljhi to dil tukde ho gaya

aine men ye baal pade tuut tuut ke

raftar men na kyuun ho chamak raqs-e-naz ki

zohra bhi hai sharik sitaron men luut ke

ai rashk-e-mah jo zohra-e-gardun ka bas chale

tode tumhare naach ke le jaae luut ke

naqd-e-hayat-o-jama-e-tan chhinti hai kyuun

ai maut kya karegi musafir ko luut ke

ambar ke badle mushk hai mauj-e-khiram men

zulfon ke baal mil gae fiite se luut ke

afshan jo chhuti aap ke mathe se raat ko

taare gire zamin par ai maah tuut ke

ro ro ke ruuh jism se kahti hai vaqt-e-naza

ai ghar milenge dekhiye kab tujh se chhut ke

mujh ko nahin pasand ye farmaish ai ‘munir’

kyuun jhuut bandhun qafiyon men tuut phuut ke

Leave a Comment